Donna Carmela ‘a Pavanese: una poesia di Antonio Avigliano

Donna Carmela ‘a Pavanese

Donna Carmé ve voglio bbene assaie!

Site ‘a cchiù bella rosa ‘e stu maggese.

Stu core mio ve guarda e dice: “vaie”!

Abbracciate a Giesù, cu ‘e mmane stese.

Vurria addiventàre palummiello.

Felice… e ‘nzuccarato pe’ sti scelle, stu pietto mio sbattesse a tammurriello.

E s’appuiasse a sta curona ‘e stelle.

Donna Carmé, regina ‘e stu paese. vasà vurria stu bello pizzo a rriso.

Mamma carnale, creatura pavanese,

primizia doce, ccà ‘nterra e ‘mParaviso.

Vuie iate ‘mprucessione dint’’e core.

Ca cantano ‘mparanza chistu mese.

Ca menano suspire a scialacore.

Ca dormono cu ll’anema curtese,

a ‘e piere vuoste, vasannole cu ‘Ammore.

 

Antonio Avigliano